2012年3月28日星期三

潮州探親第三篇:行透透


28-3-2012

想過要唔要寫潮州探親之旅呢﹖但出發之前確實冇乜關於潮州嘅遊記,
只從携程攻略搵到小小資料,潮州話晒都係一個歷史悠久的古城,
而且係我地嘅家鄉,點都盡D力介紹下潮州....

潮州市:是國家歷史文化名城,有「 海濱鄒魯」、「嶺海名邦」之美譽。
是中國十大宜居中小城市之一,同時還有優秀旅遊城市、國家園林城市、中國瓷都等稱號。
位於廣東省東部與福建省交界處。現轄湘橋區、楓溪區、潮安縣、饒平縣。
歷史上是粵東的政治、經濟、文化中心。潮州市文物古跡眾多。

潮州八景:
湘橋春漲韓祠橡木金山古松鳳凰時雨龍湫寶塔鱷渡秋風北閣佛燈西湖漁筏
早餐在如家酒店食,食完就行下街市(其實係一條巷),我同方生都好鍾意行街市...
睇下有乜買先...

第一檔就幫襯啦...橄欖、青欖,潮州人會中碎D欖加鹽同南薑撈暈食,細個食唔少﹗
除左欖重買左桑梓...

呵呵~見到D卥水鵝就留口水...買D試下先﹗

好新鮮嘅瓜菜﹗呢個唔可以買啦><

跟住行下西湖先,長者係免費我地就要買票...

湖光山色...襯埋卥水鵝,人生一樂也...D鵝肉好嫩滑一都唔鞋,卥水夠入味,好味^^

行左一陣就出去啦...

潮州八景之一:西湖漁筏

呢度都有虹橋﹖﹗

到潮州一定要行下西湖呀..

我地都係比較為食,呢間係我地嘅目標:鎮記老尾牛雜
鎮記牛雜在潮州有好多間,都是自家兄弟開,話說做得最好食就係呢間。
老尾即兄弟中排最細的意思。


睇下幾多人幫襯﹗親戚話全潮州市最出名就係呢間舖。
坐底唔係即刻有得食,會俾個籌你然後等叫號數,先至點棵條、米粉或麵,
分大、中、小碗,10、15、20元,裡面有白灼牛雜、現手切牛肉,
因在湯中白灼牛肉所以湯底特別濃郁,加埋面頭果D南薑茸,嘩﹗真係超好味﹗﹗
不過食好野真係要付代價,足足等左40分鐘﹗


起動﹗

老板冇停手...

食完野就會合表姐夫,然後就車我地去遊覽一下呢個古城....
鳳凰塔:原名涸溪塔,因側邊鳳凰洲而改名鳳凰塔

當然唔少得湘子橋
廣濟橋,始建於南宋乾道七年(公元1171年),初為浮橋,由浮船連結而成,初名康濟橋
後自兩岸向江心逐墩修築,至紹定元年(公元1228年),建成23墩。
宣德十年(公元1435年),潮州知府王源主持大橋重修,於橋上修築樓閣12座,橋屋126間,並統一名稱為廣濟橋
正德八年(公元1513年),知府譚倫增建一墩;嘉靖九年,減船六隻,形成目前十八梭船廿四洲風格。
雍正二年(公元1724年),時任知府張自謙再修,並鑄鉎牛二隻,分置西橋第八墩和東橋第十二墩,意在「鎮橋御水」。
道光二十二年(公元1842年)洪水,東墩鉎牛墜入江中。
有此民謠道:「潮州湘橋好風流,十八梭船廿四洲,廿四樓台廿四樣,二隻鉎牛一隻溜」。
橋全長約520米,現存古橋墩21座,為全國重點文物保護單位。

廣濟橋,俗稱湘子橋,位於廣東省潮州市東門外,為古代交通要道。
趙州橋洛陽橋蘆溝橋並稱「中國四大古橋」,為中國第一座啟閉式浮橋。

遠望鳳凰塔


廣濟門城樓,俗稱東門樓,位於中國廣東省潮州市湘橋區東部,正對廣濟橋
是潮州古城七城門樓之首。現一、二樓為廣濟橋史陳列館 。

從這可步行經開源寺返酒店,其實潮市不大,可以慢慢行...
如果攰可坐三輪車,一般市內都係五蚊。

從城樓外望

北閣彿燈

竹樹開花...

鰐渡秋風

今次行潮州市真係行透透啦﹗坐係堤壩上吹吹風確實好寫意^^

見時間仲早,表姐夫就車我地去潮州市廣場行下,呢度係居民嘅公園,好大啊﹗

市政府辦公大樓都在這邊

跟住就同表姐夫一家食飯,今餐姪女請,都唔同佢地客氣自己人嗎,
真多謝佢地一家的招待﹗有D唔捨得,呢D就係鄉情....
第二朝出左去食地道早餐,白粥蒸包,仲有試左叫棵汁,其實好似粉皮咁。

整番隻卥水鵝返香港...呢度廿幾蚊一斤,九龍城要7、80蚊一斤....

去老板娘度攞番D急凍左嘅糯米腸
打道回府啦...坐9:50嘅汽車返深圳,汽車站就在如家酒店斜對面,深圳僑社落車,票價140元,
結束今次回鄉之旅啦﹗

今次可說是滿載而歸﹗買左5斤茶葉、2斤花膠、2斤糯米腸、一隻卥水鵝.....
最重要係濃濃嘅鄉情,仲有就係完成奶奶嘅心願﹗自己家庭感情又進一步﹗

常說香港家庭冷漠冷淡,其實甚麼關係都要不斷營造才可繼續下去,
記得自己初結婚時好多事都唔知點處理,同奶奶真係冇乜兩句,
後黎搬開住更冇乜來往,老公係男性或者對呢d野唔係咁上心,
但我卻過不到自己,點可以咁對父母呢﹖那時都幾自責...但點可以打玻僵局﹖
之後我信了耶穌,更感愧疚...常禱告求神給我開路打破這僵局,
結果有一機會使我地團聚,我更好好珍惜這重建的關係,
所以依家有時間就去探望奶奶同佢傾下計,我笑我老公我知嘅野仲多過佢﹗
同時我覺得教養孩子身教比言教更重要,雖然上一代未必真係做得好好,
不過體諒下佢地當時嘅處境,我地依家好多唔識嘅野都可求助,上網搵資料,
佢地當時人生路不熟,為口奔馳,總之多想佢地難處,多體諒吧﹗
我希望奶奶身體健康,開開心心安享晚年﹗
希望將來可全家一齊去旅行﹗

主耶穌求你應允,誠心所願﹗